- Es ou ka wè an fas-ou an boug ki fou ?
I réponn mwen tou jennen :
- Ou pa bizwen faché, mé man pé fèw konnet yonndé fasfoud !
Man pé mennen’w MacDonald, épi si sa pa an gou’w, nou pé alé vitman Quick oben Chicken Chick. Si ou pa trouvé sa trè chik man pé mennen’w Snakc Elizé. Man pé jis fè’w dékouvè an hamburger dan an Burger King :
Man di’y kisa :
- An blegede !
I pa pran lapenn réponn mwen.
Man gadé misié kon an chien adan yol nef. I di mwen :
- Jid fout ou koutja !
Man pa té lé kwè té ja ni tousa koté pou manjé fioup, menmsi man ja alé adan resoran : O Fioup.
Man mandé misié es adan sé fasfoud-la yo té ka fè makadanm ?
I mandé mwen sa sa yé. Misié jik réponn mwen sel macadam i konnet sé sa nou ka kriyé lwiloud isi-a.
Antouléka man di misié toutan sé fasfoud la pé ké sa fè an makadanm, oben an bel soup-pié, pa mwen ké mété pié-mwen la.
Lè man fini di’y sa, i lonjé an hot-dog ba mwen é san fè wont, kom man té fen, man valé’y lamenm kon an chien ki pran an gonbo.
Jid
Bel poveb kréyol 125
« Vié kannari ka fè bon soup » mé es rété kannari toujou ?
